សូមប្រុងប្រយ័ត្ន !!ពលរដ្ឋខ្មែរ ជាង ៥០០នាក់ ចេញពីថៃ កាលពីថ្ងៃទី២០ធ្នូ

ភ្នំពេញ៖ ប្រជា​ពលរដ្ឋខ្មែរ ដែល​ចេញពីថៃ ចូលមកកម្ពុជា កាលពីថ្ងៃទី២០ ខែធ្នូ ឆ្នាំ២០២០ មានចំនួនសរុប ៥៥១នាក់ ( ស្ត្រី ១៩៥នាក់ និងកុមារ ១១នាក់ )។ អ្នកទាំងនោះ បានចូល​មកកម្ពុជា តាមបណ្តាច្រកទ្វារអន្តរជាតិ និងច្រកទ្វារតំបន់ ចំនួន ៩។ ក្នុងនោះ ច្រកអន្តរជាតិដូង ក្នុងខេត្តបាត់ដំបង ច្រើនជាងគេ​ បន្ទាប់មកច្រកតំបន់ អូរបីជាន់​។ នេះបើតាមរបាយការណ៍របស់នេត សេរី អគ្គកុងស៊ុលកម្ពុជា ប្រចាំខេត្តសាកែវ ជម្រាបជូន​លោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស នៅថ្ងៃទី២១ ខែធ្នូ ឆ្នាំ២០២០​។

សូមរម្លឹកថា ក្នុងរយៈពេលប៉ុន្មានថ្ងៃនេះ ដោយសារតែ​ថៃ ផ្ទុះការឆ្លងរាលដាលជំងឺ​កូវីដ១៩ នៅខេត្តសាមុតសាខន នាំ​ឲ្យ​មានការបារម្ភ ហើយ​ពលរដ្ឋខ្មែរមួយចំនួន បានចាកចេញពីប្រទេសថៃ ចូលមកកម្ពុជា និងមួយចំនួនទៀត ត្រូវថៃ ចាប់បញ្ជូនត្រឡប់មកវិញ ដោយសារតែការឆ្លងដែនខុសច្បាប់ ជាដើម។​

កម្ពុជា បានត្រៀមលក្ខណៈទទួលប្រជាពលរដ្ឋខ្មែរ តាមច្រកព្រំដែនធំៗ ចំនួន ៣ គឺនៅច្រកព្រំដែនអូរស្មាច់ ក្នុងខេត្តឧត្តរមានជ័យ ច្រកព្រំដែនដូង ក្នុងខេត្តបាត់ដំបង និងនៅច្រកព្រំដែនប៉ោយប៉ែត ក្នុងខេត្តបន្ទាយមានជ័យ​។

ប្រជាពលរដ្ឋទាំងអស់ មកដល់ព្រំដែន​ ត្រូវពិនិត្យ​សុខភាព និងត្រូវធ្វើចត្តាឡីស័ក ពេញលេញ យ៉ាងហ្មត់ចត់ រយៈពេល ១៤ថ្ងៃ នៅតំបន់ព្រំដែននោះ។ ក្នុងករណី ចូលមកច្រើនពេក នឹងត្រូវដឹកជញ្ជូនតាមឡានទាហាន ពីព្រំដែន ទៅធ្វើចត្តាឡីស័ក នៅតាម​ស្រុកកំណើតរៀងៗខ្លួន៕

Related posts

Leave a Comment