ពិតណាស់ ប្រិយមិត្តមួយចំនួនធំប្រាកដជាស្គាល់ច្បាស់ហើយ លោកស្រី ទ្រី ដាណា ដែលជានារីម្នាក់ដែលមានចិត្តសប្បុរសយ៉ាងខ្លាំង លោកស្រីតែងតែជួយទៅដល់ជនក្រីក្រដែលជួបការលំបាកដោយការផ្តល់ជាថវិការ និងជួយជាដើមទុនសម្រាប់រកស៊ី ។ សព្វថ្ងៃនេះ លោកស្រីជាថៅកែហាងលក់មាស ពេជ្រ និងជាបុគ្គលក្នុងសង្គមមួយរូប ដែលមានចិត្តល្អ មានចិត្ត សណ្តោសមេត្តា និងតែងតែបានជួយទៅដល់បងប្អូន ប្រជាពលរដ្ឋមួយចំនួនដែលកំពុងតែជួបនូវទុក្ខលំបាក ក៏ដូចជា មានបញ្ហាផ្សេងៗក្នុងគ្រួសារផងដែរនោះ ។
នៅមុននេះបន្តិច យោងតាមគណនីហ្វេសប៊ុករបស់លោកស្រី ទ្រី ដាណា បានបង្ហោះសារថា ពេលចូលហាង បើមានលុយរាប់រយដុល្លារ ក្នុងហោប៉ៅ មានទូរសព្ទល្អមួយគ្រឿងប្រើ ទោះស្លៀកខោខ្លី ក៏គិតថា ខ្លួនឯងឡូយ តែពេលគ្មានលុយក្នុងវិញ ទោះទ្រនុយសង្ហាយ៉ាងណា ក៏មានអារម្មណ៍ថារអៀសខ្លួន ធ្លាប់ចឹងអត់?ឥឡូវខ្ញុំសួរ មានអ្នកណាដឹងអត់ថាក្នុងខ្លួនបងប្អូនមានលុយប៉ុណ្ណេះ ឬមានលុយប៉ុណ្ណា? គេដឹងអត់ ថាអ្នកនៅផ្ទះប៉ុណ្ណា ជិះឡានម៉ាកអី ប្រើទូរសព្ទម៉ាកអី?
ពេលខ្លះ វាគ្រាន់ជាអារម្មណ៍របស់អ្នកទាំងអស់គ្នា មើលមកខ្លួនឯងប៉ុណ្ណោះ។ ត្រូវបំពេញបំណងខ្លួនឯង ដឹងពីខ្លួនឯង ជាជាងបំពេញភ្នែកអ្នកដទៃ ឬធ្វើដើម្បីបង្ហាញអ្នកដទៃ។ ត្រូវគិតថា បើយើងមានក្ដីស្រមៃ ហើយសម្រេចស្រមៃនោះបាន ទើបជាជោគជ័យខ្លាំងបំផុត និងមានន័យបំផុតខ្ញុំឃើញមនុស្សច្រើនណាស់ ដែលដើរផ្លូវខុស ព្រោះតែចង់សម្ញែងអ្នកដទៃ ក៏យកដើមទុនរកស៊ី ទៅទិញរបស់ល្អ ឡានទំនើប ផ្ទះវីឡាធំៗ រួចចងការធនាគារមករកស៊ីវិញ។ យើងមានអារម្មណ៍ថា ជិះឡាន 570 ឡូយក្នុងភ្នែកគេអ្នកជិះ 330 តែតាមពិតអ្នកជិះ 330 នោះ មានវីឡាតម្លៃកន្លះលានដុល្លារនៅ។ យើងគិតថា យើងឡូយក្នុងភ្នែកគេ តែតាមពិត គេឡូយជាងយើង តែគេមិនខ្វល់។
ជីវិតមិនមែនដើម្បីប្រៀបធៀបជាមួយអ្នកដទៃទេ ជីវិតគឺជាការខំប្រឹង តស៊ូ និងធ្វើអីដែលមានប្រយោជន៍ចំពោះខ្លួនឯង គ្រួសារ សង្គម ហើយមិនប៉ះពាល់ដល់អ្នកដទៃ។ ប្រឹងរកស៊ី ប្រឹងធ្វើការ ពេលណាយើងបានប្រឹងអស់ពីលទ្ធភាពហើយ យើងទទួលបានសមិទ្ធផលសម្រាប់ខ្លួនឯង យើងបានសម្រេចក្ដីស្រមៃ យើងជប់លៀងអបអរខ្លួនឯង និងមនុស្សជាទីស្រលាញ់ មិនមែនធ្វើវាដើម្បីបង្អួតអ្នកដទៃនោះទេ៕
