ប្រពៃណាស់!! ចូលរួមសេរី ៣ ថ្ងៃពេញ អបអរខួប ៤ ឆ្នាំ ចាប៉ីដងវែងបានចូលបញ្ជីបេតិកភណ្ឌវប្បធម៌ពិភពលោក…

ស.ស.យ.ក ខេត្តស្វាយរៀង ដឹកនាំដោយសហគមន៍ចាប៉ីអមតៈ និង មានការគាំទ្រដោយក្រសួងវប្បធម៌ និង វិចិត្រសិល្បៈ បានរួមគ្នាប្រារព្ធកម្មវិធីអបអរសាទរខួប ៤ ឆ្នាំ នៃការដាក់បញ្ចូលចាប៉ីដងវែងក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ ។

កម្មវិធីនេះគឺធ្វើឡើងរយៈពេល ៣ ថ្ងៃ គឺចាប់ពីថ្ងៃទី ៣០ ខែវិច្ឆិកា ដល់ថ្ងៃទី ២ ខែធ្នូ ឆ្នាំ ២០២០ នៅសាកលវិទ្យាល័យភូមិន្ទវិចិត្រសិល្បៈ ដោយបើកឱ្យសាធារណៈជនទូទៅបានចូលរួមទស្សនាដោយឥតគិតថ្លៃ ។ កម្មវិធីនេះធ្វើឡើងក្នុងគោលបំណងធំៗចំបង ២ គឺ ទី១ ដើម្បី រំឭកខួប ៤ ឆ្នាំនៃការដាក់បញ្ជូលចាប៉ីដងវែង ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ និង ទី ២ ជាទិវាផ្សព្វផ្សាយសិល្បៈ វប្បធម៌ ប្រពៃណីខ្មែរ និង ខួប ៤២ ឆ្នាំ សហភាពសហព័ន្ធយុវជនកម្ពុជា ២ ធ្នូ ។

គួររំឭកផងដែរ ចាប៉ី​ដង​វែង​របស់​កម្ពុជាត្រូវ​បាន​អង្គការ​យូណេស្កូអនុម័ត​ដាក់​ចូល​ក្នុង​បញ្ជី​បេតិកភណ្ឌ​វប្បធម៌​អរូបី​នៃ​មនុស្ស​ជាតិ កាលពីថ្ងៃទី ៣០ ខែវិច្ឆិកា ឆ្នាំ ២០១៦ ដែលឧបករណ៍​ភ្លេង​បុរាណ​ខ្មែរមួយ​នេះ ស្ថិតក្នុង​បញ្ជី​បេតិកភណ្ឌ​អរូបីដែលត្រូវ​ការ​សង្គ្រោះ​បន្ទាន់ ៕

Related posts

Leave a Comment